L’ÒSTESS (n. 97)

Un pilòta bulgnàis al partéss da l'areopórt Marcóni e, quànd l'é bèle in quòta, al ciàpa al micròfon pr'augurèr al bàn viàz ai pasegér, par dìri l'altàzza, la temperatùra e tótt al rèst e pò al pógia al micròfon e al dìs col secànd pilòta:

"Ooo, adès a càz só al pilòta automàtich, a bàvv un cafà e am fàgh fèr un bèl buchén da l'òstess!"

Mó als n'éra brìsa acórt che al micròfon l'éra vanzè impiè! L'òstess, ch'l'éra in fànd a l'areoplàn a sarvìr da bàvver ai pasegér, la d'vànta tótta ràssa e la córr vérs la gabén-na ed pilotàg' col cabarè in màn, sàul che la scapózza e la rózzla par tèra. Alàura ai sèlta só un v'ciarlàtt ch'a gli dìs:

"Ch'la vàga pur piàn, sgnurén-na, l'à détt che prémma al bàvv un cafà!"