lunedì 28 aprile 2008

AL DIRETÀUR (n. 127)

Un cliànt al và int un negózi d'abigliamànt e al d'mànda al prézi d'una màia.

"La màia la càssta dismélla frànch, mó s'al vól la parùr compléta, a avàn ànch el mudànt chi càssten zenqvmélla frànch".
"Gràzie" al dìs e al và fóra. Dù dé dàpp al tàurna e al d'mànda un'ètra vólta al prézi e sàmper ch'al cumàss ai arspànd:

"La màia la càssta dismélla franch, mó s'al vól la parùr, ai é ànch el mudànt a zenqvmélla".
"Gràzie" al dìs e al và vì.

E ògni dù o trì dé l'éra sàmp'r éd quàlla: al v'gnèva dànter, al d'mandèva al prézi e al turnèva fóra sànza cumprèr gnìnta, infén che un dé al cumàss al se stufé e al gé incósa al Diretàur: "Quànd al vén, st'ètra vólta, ciàmum mé!". Un dé al le vàdd arivèr e al dìs: "Sgnàur Diretàur: écco l'é là ch'l'arìva!". Al Diretàur als fà truvèr con un bèl sorìs:

"Ch'al dégga".
"N'iél brìsa ch'al cumàss di èter dé?"
"Nà, incù l'é malè, al dégga pùr con mé".
"A v'révv savàir….."
"Al prézi d'la màia?" al l'antézzipa al Diretàur.
"Sè".
"Dànca la màia la càssta ventmélla frànch e, s'al vól la parùr, el mudànt i càssten daumélla frànch".
"Mó cum'éla che i prézi i én difarént dal sólit?"
"Parché mé ai ò tirè só la màia e zà el mudànt, par mód che ló als vàga a fèr dèr int al cùl!"

Nessun commento: