lunedì 21 aprile 2008

LA FOTOGRAFÌ (n. 120)

Un umarèl al sinté dìr che à la "Cà dal Pòpol" i fèven un bàn cafà. Ló l'avèva tótta un'ètra idèa pulética, mó al cafà ai piasèva dimóndi e als dezidé ed pruvèr. Al và dànter e al dìs:

"Un cafà".
Al barésta al fà: "Mé at fa'al cafà, mó té prémma t'am è da dìr chi l'é luqué" e ai màsstra una fotografì.
"Chi él lulé?"
"Luqué l'é Berlinguèr: al pió gràn segretèri ch'avàggna mài avó: t'è da v'gnir qué pió spàss!" e a gli fé un cafà bunéssum.

Dàpp suquànt dé al turné e la fó la stàssa stória: "Mé at fa'al cafà, mó té prémma t'am è da dìr chi l'é luqué". Ètra fotografì.
"Chi él lulé?"
"Luqué l'é Lama, al pió gràn sindacalésta ch'avàggna mài avó: t'è da v'gnìr qué pió spàss!".

E l'éra sàmp'r ed quàlla, infén che un dé al fó ló che, urdnànd al sólit cafà, al tiré fóra una fotografì e al d'mandé al barésta:
"Al sèt té chi l’é luqué?"
"Mé nà, chi él?"
"Luqué l'é Luciàno, quàll ch'al và a lèt con tó muiér: t'è da stèr pió spàss a cà tó!".

Nessun commento: